பருவ மழைகாலமும்! பரவி வரும் நோய்களும்

➠ பொதுவாக மழைகாலம் என்பது ஒரு ஆண்டில், ஒரு இடத்தில் குறிப்பிட்ட அளவு பெய்யும் மழையின் சராசரி அளவு ஆகும். இந்த பருவகாலமானது இடத்திற்கு இடம் மாறுபடும்.

➠ தற்போது தமிழ்நாட்டில் பருவமழை தொடங்கியுள்ளதால் குழந்தைகள் முதல் பெரியவர்கள் வரை அனைவருக்கும் நோய் ஏற்படுவதற்கான வாய்ப்புகள் உள்ளன.

மழைக்கால நோய்கள் :

➠ இக்காலக் கட்டத்தில் ஆஸ்துமா, ப்ளு ஃ வைரஸ் ஜுரம், வயிற்றுபோக்கு, காலரா, பூஞ்சை நோய்கள், மலேரியா, டெங்கு, வைரஸ் காய்ச்சல், சீதபேதி, கண் சம்மந்தப்பட்ட நோய்கள், டைபாய்டு காய்ச்சல் மற்றும் சிக்கன் குனியா போன்ற நோய்கள் வரக்கூடும்.

மழைக்கால நோய்களில் பாதிக்கப்படாமல் இருக்க வழிமுறைகள் :

உணவில் சேர்த்து கொள்ள வேண்டியவை :

➠ மதிய உணவின்போது தூதுவளை ரசம் வைத்து சாப்பிடலாம். இவை சளி, காய்ச்சல் போன்ற நோய்களுக்கு சிறந்த தீர்வாகும்.

➠ இரவு தூங்குவதற்கு முன், பாலில் மஞ்சள் தூள், மிளகுத்தூள், பனங்கற்கண்டு சேர்த்து சாப்பிடுவது நல்லது. பொரியல் செய்யும்போது அவற்றில் மிளகு பொடியைச் சேர்த்துச் சமைத்து சாப்பிடுவது நல்லது.

➠ பால் மற்றும் பால் சார்ந்த தயிர், வெண்ணெய், நெய் போன்றவற்றையும் அதிகம் சாப்பிடக்கூடாது. ஆனால் மோர் சாப்பிடலாம். உடலுக்கு நல்லது.

➠ தினந்தோறும் நாம் குடிநீரை சுத்தப்படுத்தி கொதிக்க வைத்து, ஆறிய பின்பே குடிக்க வேண்டும்.

➠ உண்ணும் உணவில் அதிக அளவில் காய்கள், பழங்கள் சேர்த்துக் கொள்ள வேண்டும். காய்கள், பழங்களை நன்கு கழுவிய பின்னரே சாப்பிடவேண்டும்.

➠ உணவில் காரம், கசப்பு, துவர்ப்பு சுவையுள்ள உணவுகளை அதிகம் சேர்த்துக் கொள்ளலாம். மேலும் தினமும் சாப்பிடும் உணவையே சற்று சூடாக சாப்பிட்டால் போதுமானதாகும்.

உணவில் சேர்த்து கொள்ள கூடாதவை :

➠ இரவு உணவில் பச்சைப்பயறு, கேழ்வரகு, கீரை ஆகியவற்றைச் சேர்க்கக்கூடாது.

➠ எண்ணெயில் பொரித்த உணவுகளையும் அதிகம் சாப்பிடக்கூடாது.

➠ கடைகள் மற்றும் வெளியிடங்களில் சாப்பிடுவதை முற்றிலும் தவிர்க்க வேண்டும். மழைக்காலங்களில் எல்லா காய்கறிகளையும் உணவில் சேர்த்துக் கொள்ளலாம்.

➠ சிலருக்கு தண்ணீர் சத்து அதிகமுள்ள காய்கறிகள் ஒத்துக்கொள்ளாது. நீர்ச்சத்துக்கள் நிறைந்த சுரைக்காய், பூசணி, புடலை, பீர்க்கன், வெள்ளரி போன்ற காய்கறிகளை, மழைக்காலங்களில் உணவில் சேர்த்துக் கொள்வதை தவிர்க்க வேண்டும்.

சுற்றுப்புறச்சூழல் :

➠ நமது சுற்றுபுற சூழலில் இருக்கும் கொசுக்களிடம் இருந்து நம்மையும் நமது குடும்பத்தினரையும் பாதுகாக்க உரிய பாதுகாப்பு செய்து கொள்ளவேண்டும்.

➠ தெருக்களில் மழைகாலங்களில் மழைநீர் தேங்காமல் இருக்க சம்பந்தப்பட்ட அதிகாரிகளிடம், தெரிவித்து அதற்கு உரிய நடவடிக்கைகள் செய்ய சொல்ல வேண்டும்.

➠ நமது வீடுகளை சுற்றிலும் தண்ணீர் தேங்காமல் பராமரிக்க வேண்டும். அவசரத் தேவைகள் எனில் மருத்துவரை அணுகி உரிய மருத்துவ சிகிச்சை பெற்று கொள்ளவேண்டும்.

➠ மேலும், அரசாங்கத்தால் அறிவிக்கப்படும் தற்காப்பு நடவடிக்கைகளை தவறாமல் மேற்கொள்ள வேண்டும். அரசு மருத்துவ முகாம்களை நடத்த ஏற்பாடு செய்யும் தருணங்களில் அதில் கலந்து கொண்டு ஆலோசனை பெற்று அதன்படி நடந்து கொள்ளவேண்டும்.

எண்ணம் மற்றும் எழுத்தாக்கம்  
ச.நடனம்.
சுற்றுச்சூழல் ஒருங்கிணைப்பாளர் திருவாரூர்